წიქვაძე რუსუდან მიხეილის ასული (24.III.1930, თბილისი – 2016, თბილისი), ფილოსოფოსი, ეთიკოსი. ფილოს. მეცნ. კანდიდატი (1966), თსუ-ის დოცენტი (1971). წარმატებით დაამთავრა თსუ-ის ფილოსოფიის ფაკ-ტი (1948-1953). მისი აკად. საქმიანობა სრულად უკავშირდებოდა თსუ-ის ეთიკისა და რელიგიათმცოდნეობის (ყოფ. ეთიკისა და ესთეტიკის) კათედრას, სადაც იგი ათწლეულების განმავლობაში ეწეოდა ნაყოფიერ სამეცნ.-პედ. მოღვაწეობას. დაიცვა საკანდიდატო დისერტაცია თემაზე: „ზნეობრივი მოვალეობის არსისათვის“ (1966). კითხულობდა საუნივერსიტეტო კურსებს:ეთიკა; ეთიკის ისტორია; ქართ. ეთიკური აზრის ისტორია და სხვ. იგი იყო არაერთი სასწ.-მეთოდ. სახელმძღვანელოსა და პროგრამის ავტორი, რ-ებიც ფართოდ გამოიყენებოდა სტუდენტების მიერ. აქტიურად მონაწილეობდა უნ-ტის სამეცნ. სემინარებში, სადაც გამოდიოდა მოხსენებებით თანამედროვეობის აქტუალურ ზნეობრივ პრობლემებზე. მისი ღვაწლი თსუ-ის ფილოსოფიის ფაკ-ტის ისტორიაში მნიშვნელოვანია, რადგან ხელი შეუწყო ეთიკური კვლევების ტრადიციის შენარჩუნებასა და მის გადაცემას ახ. თაობებისათვის. სამეცნ.-პედ. სფეროში ხანგრძლივი მოღვაწეობისათვის დაჯილდოებული იყო უნ-ტის საპატიო სიგელებით.

თხზ.: წიქვაძე, რ. (1966). ზნეობრივი მოვალეობის არსისათვის. თბ.; წიქვაძე, რ. (1975). ეთიკის შესავალი. თბ.; წიქვაძე, რ. (1983). XIX საუკუნის საქართველოს ეთიკური აზრის ისტორიიდან. თბ.; წიქვაძე, რ. (1988). ზნეობრივი და ესთეტიკური ფასეულობანი. თბ., ; წიქვაძე, რ. (1995). ეთიკური მოძღვრებები საქართველოში. თბ.

მასზე: თევზაძე, გ. (1998). თანამედროვე ქართული ეთიკური აზრი. თბ., თსუ-ის შრომები, ტ. 328; ბერძენიშვილი, ა. (2005). ეთიკური ძიებანი რუსუდან წიქვაძის შრომებში. კრებულში: „ქართველი ფილოსოფოსები“; ირემაძე, თ. (2010). ფილოსოფიური ეთიკის განვითარება თბილისის უნივერსიტეტში. თბ.