შუშანაშვილი გერონტი გიორგის ძე (1933, სოფ. თიანეთი-2012, თბილისი), ფილოსოფოსი, ეთიკოსი. ფილოს. მეცნ. დოქტორი (1989), პროფესორი, საქართვ. ფილოსოფიურ მეცნ. აკად. აკადემიკოსი (1995). დაამთავრა თსუ-ის ფილოსოფიის ფაკ-ტი (1959-1964). სწავლობდა საქართვ. მეცნ. აკადემიის ს. წერეთლის სახ. ფილოსოფიის ინ-ტის ასპირანტურაში (1965–1968). მისი აკად. საქმიანობა მჭიდროდ უკავშირდება აღნიშნულ ინ-ტს, სადაც წლების განმავლობაში ხელმძღვანელობდა ეთიკის განყ-ებას. დაიცვა სადოქტორო დისერტაცია თემაზე:„ფენომენოლოგიური ეთიკის კრიტიკა“ (1989). მისი სამეცნ. ინტერესების მეორე მნიშვნელოვანი მიმართულებაა ზნეობრივი ღირებულების სპეციფიკა. მონოგრაფიაში „ზნეობრივი ღირებულების სპეციფიკა“ (1980), ავტორი განიხილავს მორალურ ფასეულობათა ონტოლოგიურ და გნოსეოლოგიურ ბუნებას. ნაშრომში „ღირებულების პრობლემა და საზოგადოებრივი ცნობიერების ფორმები“ (1987), შ. იკვლევს კავშირს ეთიკურ ნორმებსა და სოციალურ სტრუქტურებს შორის. განსაკუთრებული ყურადღება დაუთმო ფენომენოლოგიური ეთიკის კრიტიკულ ანალიზს (მ. შელერი, ნ. ჰარტმანი), სადაც გამოკვეთა ამ მიმართულების როგორც მიღწევები, ისე მეთოდოლ. ხარვეზები. პედ. თვალსაზრისით, შ. გ. თსუ-ში და სხვა უმაღლეს სასწავლებლებში კითხულობდა კურსებს:ეთიკა; აქსიოლოგია; ეთიკის ისტორია. მისი ლექციები გამოირჩეოდა თეორ. მასალის გადმოცემის სისტემურობითა და აქსიოლოგიური საკითხების ღრმა ანალიზით. შ. გ. არის მრავალი სამეცნ. სტატიის ავტორი, რ-ებიც გამოქვეყნებულია ქართულ, რუსულ და გერმანულ ენებზე. მისი ღვაწლი ფილოსოფიის ინ-ტის ეთიკის განყ-ების ჩამოყალიბებასა და განვითარებაში ფასდაუდებელია, რადგან მან საფუძველი ჩაუყარა ეთიკური კვლევების ახ. მიმართულებას საქართველოში.

თხზ.: შუშანაშვილი, გ. (1974). კანტის ეთიკური ფორმალიზმის შელერისეული კრიტიკის ანალიზი. თბ.; შუშანაშვილი, გ. (1980). ზნეობრივი ღირებულების სპეციფიკა. თბ., მეცნიერება; შუშანაშვილი, გ. (1987). ღირებულების იდეალისტური გაგების კრიტიკა თბ., მეცნიერება; შუშანაშვილი, გ. (1989). ფენომენოლოგიური ეთიკის კრიტიკა. თბ., შუშანაშვილი, გ. (1990). ღირებულება და საზოგადოებრივი ფორმები. თბ. მეცნიერება.

მასზე: მახარაძე, მ. (2013). ქართული ფილოსოფიური აზრის ისტორია, ტ. 4; თევზაძე, გ. (1998). თანამედროვე ქართული ეთიკური აზრი. თბ., თსუ-ის შრომები, ტ. 328; ჯახაია, ლ. (2004). გერონტი შუშანაშვილი — ეთიკოსი და მკვლევარი. თბ., ფილოსოფიური ძიებანი, №16; ბერძენიშვილი, ა. (2005). აქსიოლოგიის პრობლემები გ. შუშანაშვილის ნაშრომებში. თბ., ქართვ. ფილოსოფოსები.