ნარმანია დავით როლანდის ძე (07.III.1979, ზუგდიდი, სოფ. კოკი), ეკონომისტი. თსუ–ის ეკონ. და ბიზნესის ფაკ–ტის პროფესორი, საქართვ. ენერგეტ. და წყალმომარაგების კომისიის (სემეკი) თავ–რე (2017–დან). წარჩინებით დაამთავრა თსუ–ის საინჟ.-ეკონ. ფაკ.–ტი სპეციალობით საგარეო ეკონ. საქმიანობის ორგანიზაცია და მართვა (1996-2000), ასევე წარჩინებით დაამთავრა მაგისტრატურა (2000-2003) და ჩაირიცხა ასპირანტურაში. ასპირანტურაში სწავლის პერიოდში ატარებდა პრაქტ. მეცადინეობებს სტუდენტებთან და მუშაობდა სადისერტაციო ნაშრომზე: ,,თამბაქოს ინდუსტრიის განვითარების ეკონომიკური პრობლემები საქართველოში”, რ–იც წარმატებით დაიცვა ( 2006)   და მიენიჭა ეკონომიკის მეცნ. კანდ. კვალიფიკაცია. ორგზის სამეცნ. სტაჟირება გაიარა გერმანიის პოტსდამის უნ-ტში. სწავლის პარალელურად, ნ.დ. აქტიურად იყო ჩართული საქართვ. ახალგაზრდა ეკონომისტთა ასოციაციაში, როგორც ეკონ. განათლების პროგრამის კოორდინატორი, გამგეობის თავ-რის მოადგილე და შემდეგ გამგეობის თავ-რე. აქტიურად იყო ჩართული საზ–ებრივ საქმიანობაში. იგი საზ–ებრივი განვითარების ინ-ტის საგადასახადო-საბიუჯეტო პროგრამის კოორდინატორი და საზ–ებრივ საქმეთა ინ-ტის (GIPA) პროფესორია და კავკასიის ეკონ. და სოც. კვლევის ინ-ტის აღმასრულებელი დირექტორი. ნ.დ.–ს გააჩნია საჯარო და კერძო სექტორში მუშაობის მდიდარი გამოცდილება. მუშაობდა საქართვ. საგადასახადო შემოსავლების და ფინანსთა სამინისტროს სისტემაში სხვადასხვა პოზიციაზე. საქმიანობდა კერძო სექტორშიც (2001-2012). ნ.დ. საქართვ. პარლამენტის მიერ არჩეულ იქნა საქართვ. რეგიონული განვითარების და ინფრასტრუქტურის მინისტრად (2012-2014). იყო დედაქალაქის მერი და საქართვ. დელეგაციის ხელმძღვ. ევროსაბჭოს რეგიონული და ადგილ. თვითმმართველობის კონგრესში. დღემდე არის თსუ–ის სრული პროფესორი, მენეჯმენტისა და ადმინისტრირების კათედრის გამგე, საქართვ. ტექნ. უნ–ტის მოწვეული ლექტორი (2012-დან). მიენიჭა ბათუმის რუსთაველის სახ. სახელმწ. უნ-ტის  საპატიო  დოქტორის  წოდება (2025). გამოსცა 50-ზე მეტი სამეცნ. ნაშრომი და პუბლიკაცია, არის 2 სახელმძღვანელოს თანაავტორი.

თხზ.: ნარმანია, დ. (2009). საზოგადოებრივი ადმინისტრირების საფუძვლები და საზოგადოებრივი ადმინისტრირება საქართველოში. თბ., უნ–ტის გამ–ბა, ISBN 0789941014031; ნარმანია, დ. (2012). რისკ-მენეჯმენტი ბიზნესში. თბ., უნ–ტის გამ–ბა, ISBN 9789941176999; ნარმანია, დ. (2023). ნატო-აღრიცხვა და მე-4 ენერგეტიკული პაკეტის მთხოვნები. Forbes Georgia.№143, გვ. 28–29. თბ. ; ნარმანია, დ. (2025). ელექტროენერგეტიკის სექტორში მიწოდების საჯარო მომსახურების სახით განხორციელების ვალდებულების მქონე საწარმოების სატარიფო რეგულირების პრინციპები. ენერგეტიკის რეგულირება=Energy regulation №1 გვ.6–7. თბ.