მიულერი შტეფან (Stefan Müller, 1952, კრონახი, გერმანია), ბონის საუნივერსიტეტო ჰოსპიტლის უროლოგიური კლინიკისა და პოლიკლინიკის დირექტორს, მიენიჭა საპატიო დოქტორის წოდება (06.IX.2006).

მ. შ. იულიუს მაქსიმილიანის  სახ. ვიურცბურგის უნ-ტში ეუფლებოდა მედიცინის მეცნიერებებს და მოიპოვა  დოქტორის სამეცნ. ხარისხი (1978). იგი მოღვაწეობდა ლოს-ანჯელესსა და ბალტიმორში. სან-ფრანცისკოს საუნივერსიტეტო კლინიკაში საქმიანობის შემდეგ, უროლოგიის კლინიკის  მთავარი ექიმისა და მაინცის საუნივერსიტეტო კლინიკის პრივატდოცენტის პოზიციები ეკავა (1990-1994). მ. შ. ბონის უნ-ტის უროლოგიის კათედრის  ხელმძღვანელის თანამდებობაზე მიიწვიეს (1994). იგი, აგრეთვე, იტალიის ანკონას  უნ-ტის მოწვეული პროფესორია.

მ. შ.-ს სამეცნ. კვლევის ძირითადი საკითხებია: ოპერატიული ონკოლოგია (პროსტატა, შარდის ბუშტი), გარე სასქესო ორგანოების რეკონსტრუქცია, პედიატრიული უროლოგია, უროლითიაზისა და პროსტატის კიბოს გამომწვევი მიზეზები. 

მ. შ.-ს უროლოგთა გერმანულმა საზოგადოებამ მაქსიმილიან ნიცეს სახ. ჯილდო გადასცა (1999). იგი ხელმძღვანელობდა უროლოგთა გერმანული საზოგადოების უწყვეტი განათლების პროგრამას (2003-2004), შემდეგ კი ამავე ორგანიზაციის მეორე ვიცე-პრეზიდენტად აირჩიეს (2012). იგი 100-ზე მეტი სამეცნ. პუბლიკაციის ავტორი და თანაავტორია.