ხარშილაძე ოლეგ ავთანდილის ძე (15.III.1959, ზაპოროჟიე, უკრაინა). ფიზიკოსი, წარჩინებით დაამთავრა თსუ-ის ფიზიკის ფაკ-ტი (1981). იმავე წელს მიწვეული იყო ზოგადი ფიზიკის კათედრის ლაბორანტის თანამდებობაზე და პარალელურად კითხულობდა ლექციებს და ატარებდა პრაქტიკულ მეცადინეობებს ზოგად ფიზიკაში. სწავლობდა და სტაჟირებას გადიოდა მოსკოვის სახელმ. უნ-ტის ტალღური პროცესების და ზოგადი ფიზიკის კათედრაზე ლაზერების ფიზიკის სპეციალობით (1985). საკანდიდატო დისერტაციის დაცვის შემდეგ იყო ზოგადი ფიზიკის კათედრის ასისტენტი და შემდეგ დოცენტი (1988). იყო საქართვ. კოსმ. სააგენტოს თავჯდომარის მოადგილე (2003-2007). დაიცვა სადოქტორო დისერტაცია თემაზე "დაბალი სიხშირის ელექტრომაგნიტური ტალღური სტრუქტურების გენერაცია და არაწრფივი დინამიკა იონოსფეროში" (2006). არის თსუ-ის მ. ნოდიას გეოფიზიკის ინ-ტის კოსმ. კვლევების ცენტრის მთ. მეცნიერ-თანამშრომელი (2007-დან) და თსუ-ის ზუსტ და საბუნებისმეტყველო მეცნ. ფაკ-ტის ფიზიკის მიმართულებაზე ქვემიმართულების - რადიოფიზიკა, ფიზ. პროცესების მოდელირება, ასოცირებული პროფესორი (2009-დან). როგორც ხელმძღვ. და მთ. შემსრულებელი მონაწილეობდა ბევრ სამეცნ. პროექტში  საქართველოში, ასევე საერთაშ. კოლაბორაციებსა და ფონდებში. მონაწილეობდა  საერთაშ. კონფერენციებსა და სიმპოზიუმებში. ხანგრძლივი მივლინებებით იმყოფებოდა ავსტრიის, იტალიისა და გერმანიის სამეცნ. ცენტრებში. არის 200-მდე სამეცნ. ნაშრომის ავტორი და თანაავტორი. არის მრავალი სტუდენტური სამეცნ. ნაშრომის და გამარჯვებული სტუდენტური პროექტის ხელმძღვ. მონაწილეობა მიიღო საერთაშ. კონფერენციებში და გამოქვეყნებული აქვს სტატიები სამეცნ. ჟურნალებში:,,Nonlinear wave structures of the soliton and vortex types in complex continuous media: Theory, simulation“ (LECTURE NOTES of TICMI, 2018); ,,საქართველოს მექანიკოსთა კავშირის XII ყოველწლიური საერთაშორისო კონფერენცია = XII Annual International Meeting of the Georgian Mechanical Union“ (მოხსენებათა თეზისები, 2020); ,,კრისტალური სტრუქტურა და მიკროსისალე InAs, InP და InAsP შენადნობების {111} ზედაპირებზე” (მოამბე=Bulletin, საქართვ. მეცნ. ეროვნ. აკად., 2025, ტ. 19 (193), N 4).

თხზ.: ხარშილაძე, ო. (რედ.). (2018). მოდელირება ეკოლოგიაში. თბ. უნ-ტის გამ-ბა, ISBN 9789941137075 (pdf).