ბანცური რევაზ (10.VI.1936,  სოფ. ბანცურთკარში, დუშეთის რ-ნი- 10. I. 2014,  თბილისი), ქართვ. მათემატიკოსი, მექანიკოსი.  დაამთავრა თსუ-ის ფიზ.-მათ. ფაკ-ტი (1960).  ფიზ.-მათ. მეცნ. დოქტორი (1982); საქ. მეცნ. აკად. წ.-კორ. (1997); პროფესორი (1972). მუშაობდა თბილ. ა. რაზმაძის სახ. მათ. ინ-ტში სხვადასხვა თანამდებობაზე (1960-2014). იგი გახლდათ დრეკადობის მათ. თეორიის განყ-ბის გამგე (1983), თეორიულ და გამოყენებით მექანიკაში რუსეთის ნაციონალური კომიტეტის წევრი (1993). წლების განმავლობაში მოღვაწეობდა თსუ-ის მექ.-მათ. ფაკ-ტის თეორ. მექან. კათედრაზე. ბ. რ.-ის სამეცნ. შრომები ეძღვნება დრეკადობის ბრტყელი თეორიის სასაზღვრო საკონტაქტო ამოცანებს, ანალიზურ ფუნქციათა თეორიის შერეულ სასაზღვრო ამოცანებს, დრეკადობის თეორიის ნაწილობრივ უცნობსაზღვრიან ამოცანებს, ნახვევის ტიპის ინტეგრალურ და უსასრულო ალგებრულ განტოლებათა სისტემებს. მან არსებითად განავითარა ნ. მუსხელიშვილის თემატიკა და ახ. მიმართულებებით მნიშვნელოვნად გააფართოვა დრეკადობის ბრტყელ თეორიაში ანალიზურ   ფუნქციათა თეორიის მეთოდების გამოყენების სფერო. ბ. რ.-მა ინტეგრალური გარდაქმნების გამოყენებით ზოგიერთი კლასის საკონტაქტო ამოცანა დაიყვანა ანალიზურ ფუნქციათა თეორიის ახალი ტიპის გადაადგილებიან სასაზღვრო ამოცანაზე, რ-საც მან უწოდა კარლემანის ტიპის ამოცანა ზოლისათვის. მან დაამუშავა ახ. ტიპის ფაქტორიზაციის მეთოდი და ამოხსნა კარლემანის ტიპის ამოცანა საკმაოდ ზოგად შემთხვევაში. აღნიშნულ მეთოდს ზემოთხსენებული ამოცანებისათვის იგივე მნიშვნელობა აქვს, რაც XX ს. ორმოციან წლებში შესწავლილ საკონტაქტო ამოცანებისათვის დამუშავებულ ნ. მ-ის მეთოდს. ამიტომ ეს მეთოდი ცნობილია კანონიკურ ამოხსნათა ბ. რ.-ის მეთოდის სახელწოდებით და ამჟამად წარმოადგენს ერთადერთ ზოგად მეთოდს, რ-იც იძლევა ხსენებული საკონტაქტო ამოცანების ეფექტური ამოხსნის საშუალებას. მანვე, ნაწილობრივ უცნობსაზღვრიანი ამოცანების ზოგიერთი კლასისათვის დაამუშავა ფაქტორიზაციის მეორე მეთოდი, რომლის გამოყენებითაც მოგვცა ამ კლასის ამოცანების ამოხსნადობის დასრულებული თეორია. მის მიერ მიღებული შდეგებიდან სპეციალისტების მიერ ერთ-ერთ საუკეთესოდ აღიარებულია ძაბვათა კონცენტრაციის საკითხის შესწავლა ბზარის ბოლოებში. მან მიიღო უაღესად მნიშვნელოვანი შედეგი რღვევის მექანიკაში, რამაც დიდი პრაქტიკული გამოყენება ჰპოვა მანქანათმშენებლობაში, გემთმშენებლობასა და საავიაციო კონსტრუქციების დაპროექტებაში. ააგო ინტეგრალური წარმოდგენები კარლემანის ტიპის ამოცანებისათვის, რომლებიც იგივე როლს ასრულებენ, რასაც ცნობილი კოშის ტიპის  ინტეგრალები წრფივი შეუღლების ამოცანებისათვის. ბ. რ. გახლდათ რამოდენიმე ადგილობრივი სამეცნ. გრანტის ხელმძღ. და რამოდენიმე სამეცნ. ჟურნალის სარედაქციო კოლეგიის წევრი, მისი ხელმძღვანელობით დაცულია ათზე მეტი სამეცნ. დისერტაცია ფიზ.-მათ. მეცნ. კანდ. და მეცნ. დოქტორის სამეცნ. ხარისხის მისანიჭებლად. ბ. რ.-ს მინიჭებული აქვს საქართვ. მეცნ. ეროვნ. აკად.  აკად. ნ. მუსხელიშვილის სახ. პრემია (2011). გამოქვეყნებული აქვს 50-ზე მეტი სამეცნ. ნაშრომი.

თხზ.: Bantsuri, R. (2014) Contact problems of plane elasticity theory and related boundary value problems of function theory. Mem. Differ. Equ. Math. Phys. 62, 170 pp.